Ümumtəhsil məktəblərində biologiyanın tədrisi prosesinin təşkili
aşağıdakı prinsiplər əsasında həyata keçirilir.
1. Pedaqoji prosesin tamlığı. Bu prinsipə əsasən
şagirdin bir şəxsiyyət kimi formalaşması nəzərdə tutulur.
Təhsil öyrədici, inkişafetdirici və tərbiyəedici
bir prosesdir.
Biologiya fənninin tədrisi prosesində şagird canlılar aləmində
baş verən hadisə və prosesləri, canlıların ətraf mühitlə əlaqəsini, insanın
özünəməxsus həyati xüsusiyyətləri barədə bilik və bacarıqlara yiyələnir.
Biologiya kurikulumunda canlılara xas quruluş formalarının, onların həyati xüsusiyyətlərinin müqayisəli təqdim
edilməsi müxtəlif aləmlərə aid canlı nümunələrin sadədən mürəkkəbə doğru
müqayisəli təqdim edilməsi şagirdlərdə analitik düşüncə tərzinin formalaşması
ilə yanaşı, canlılar barədə yığcam və lakonik məlumat almaq imkanı yaradır.
Biologiyanin tədrisi vasitəsilə şagirdlərdə estetik,
ekoloji tərbiyə formalaşır. Şagird öz sağlamlığının, ətraf mühitin, vətəndaşı
olduğu doğma yurdunun qorunması ruhunda tərbiyə alır, təhsil prosesində
dünyanın bütöv bir vahid kimi qavranılmasına və
dərk edilməsinə hazırlanır.
2. Təlimdə bərabər imkanların
yaradılması. Bu prinsipə əsasən biologiya fənninin təlimi elə qurulur ki, şagirdin sosial vəziyyətindən,
fərdi psixi xüsusiyyətlərindən əqli keyfiyyətlərindən asılı olmayaraq münasib təlim
şəraiti yaradılsın. Bu zaman şagird-müəllim münasibətləri «subyekt-subyekt»
formulu üzrə həyata keçirilir.
3. Şagirdyönümlülük. Şəxsiyyətin inkişafı
təlim prosesinin əsasını təşkil edir. İnkişafetdirici təlim şəxsiyyətin
formalaşdırılmasını nəzərdə tutmaqla onu təlimin başlıca problemi kimi mənalandırır.
Biologiya
dərslərində müəllimin şagirdlərlə ünsiyyəti bir-birilə əlaqədar olan və bir-birini şərtləndirən, müxtəlif şəraitlərdə
yerinə yetirilən birgə fəaliyyətlərdə meydana çıxır. Bundan əlavə, şagirdlərin
hər biri cinsi, etnik, dini, irqi mənsubiyyəti, fərdi intellektual inkişafı,
qavrayış, tədqiqatçılıq və s. qabiliyyəti olan bir şəxsiyyətdir.
4. İnkişafyönümlülük. Biologiyanın tədrisində şagirdə nəyi, nə üçün
öyrəndiyi aydın olmalı, əldə etdiyi bilik və bacarıqların əhəmiyyətini dərk edəcək
canlılar aləmində və öz orqanizmində baş verən proseslərə maraq yaradılmalıdır.
Tədris prosesi elə qurulmalıdır ki, şagird əldə
etdiyi bilik və bacarıqları genişləndirməyə hazırlansın, öz bilik və
bacarıqlarını inkişaf etdirməyə meyl etsin. Müəllim şagirdin nailiyyətlərini təhlil
etməklə onların bilik, bacarıq və vərdişlərinin inkişaf etdirilməsi üçün zəmin
yaradır. Şagird əldə etdiyi bilik və bacarıqlarını təhlil etməklə özünə tənqidi
yanaşır, öz imkanlarını düzgün qiymətləndirir, biologiyadan əldə etdiyi bilik və
bacarıqlardan real həyatda istifadə etməyə hazırlanır.
5.Fəaliyyətin
stmullaşdırılması.
Şagirdin fərdi imkanları, təlimə marağı əldə etdiyi uğurlu nəticələrin dəyərləndirilməsi
onun fəaliyyətini stimullaşdırır, o, əldə etdiyi bilik və bacarıqlardan sonrakı
fəaliyyəti prosesində daha səmərəli istifadə etməklə uğurlara nail olur. Müəllim
şagirdin təlim fəaliyyətini düzgün qiymətləndirdikdə şagird öz imkanlarını
anlayır, qüvvətli və zəif tərəflərini müəyyənləşdirir.
Şagirdin biologiyanın tədrisi prosesində praktik vərdişlərə
yiyələnməsi, müşahidə və tədqiqatçılıq qabiliyyətlərinin inkişaf etdirilməsi, ədəbiyyatlardan,
digər bilik mənbələrindən bacarıqla istifadə etməsi onun müstəqil, davamlı fəaliyyətini
stimullaşdırır.
6.Varislik. Bu
prinsipə əsasən canlıların sadədən mürəkkəbə, ibtidaidən aliyə doğru
inkişafı nəzərdə tutulur.
7.Yaşauyğunluq.
Biologiya fənninin tədrisində nəzərdə tutulan tapşırıqlar şagirdlərin yaş səviyyəsi
və maraqları nəzərə alınmaqla verilir. Belə ki, fənnin tədrisi
zamanı materialın çətinlik dərəcəsi mütləq nəzərə alınmalıdır. Çətinlik
uşaqların əqli fəaliyyətinin ən müxtəlif cəhətlərindən asılıdır.
8.Əyanilik. Biologiya dərslərində müxtəlif əyani vasitələrdən, təbii bitkilər və herbarilər, canlı guşədə
olan heyvanlar, müxtəlif mulyajlar və tablolar, mikroskopdan istifadə etmək
olar.Eyni zamanda biologiya dərslərində
kompüterdən istifadə dərsi maraqlı və əyani edir, şagirdləri fəal idraki fəaliyyətə
cəlb edir. Dərs prosesində İkt vasitələrindən
istifadənin üstünlüyü ondadır ki, onların köməyi
vasitəsilə təlim prosesində fərdi və differensial yanaşma ideyalarını
reallaşdırmaq şagirdləri müasir şərait və müstəqil fəaliyyətə, onların fəallığının
artmasına səbəb olur.
9.Tədqiqatyönümlülük. Biologiya
fənninin tədrisi şagirdin tədqiqatçılıq bacarıqlarını
inkişaf etdirir. Əldə etdiyi məlumatları ümumiləşdirmək, eksperimentlər
aparmaq, təbii mühitdə canlılar aləmi üzərində müşahidə aparmaqla bitkilərin
yetişdirilməsi, heyvanların bəslənməsi, insan sağlamlığının qorunması kimi
bacarıqlar formalaşdırır.
10.Müşahidəyönümlülük. Müşahidə
yolu ilə canlı təbiəti daha yaxşı öyrənmək mümkün olur. Belə ki, canlıları
müşahidə etməklə şagirdlər onlarda gedən
bioloji hadisə və prosesləri, onların xarici mühitlə qarşılıqlı əlaqəsini,
bir sözlə, canlı təbiətin inkişaf qanunauyğunluqlarını daha yaxşı dərk edirlər.
11.Yaradıcı tətbiqetmə. Hazırda biologiyanın
tədrisində şagirdlərin ekskursiyaya getmələrinin, laborotoriya işlərinin təşkilinə
böyük ehtiyac vardır. Bu işlərin təşkilində şagirdlər biologiya, fizika, kimya,
hətta riyaziyyat fənlərinin tədrisindən qazandıqları bilikləri təcrübədə tətbiq
etməyi öyrənirlər.
12.Dəstəkləyici mühitin yaradılması. Tədris prosesində dəstəkləyici mühiti yaratmaq üçün kifayət
qədər əyani və texniki vasitələr, tədris təcrübə sahəsi, müxtəlif ədəbiyyat, dərslik
və dərs vəsaitləri olmalı, peşəkarlığı yüksəldən müəllim, kömək etməyə hazır olan yoldaşlar və valideynlər bu işə qoşulmalıdırlar.
Şagirdin tədqiqatçılığı, kəşfə istiqamətləndirilməsi
şagirdin müstəqil fəaliyyətinin stimullaşdırılması üçün sağlam mənəvi psixoloji
mühit yaradılması çox vacib şərtdir.
Müəllim öz fənnini lazımi səviyyədə bilməlidir. Proqram materialı
ilə yanaşı, biologiya fənni üzrə yeniliklərlə maraqlanmalı, məktəbdə istifadə
olunan əlavə ədəbiyyatlarla, dərsliklərlə tanış olmalıdır.
Müəllimlər təlim prosesində şagirdlərin nəyi mənimsədiklərinə,
necə düşündüklərinə, tədqiqat aparmalarına və ünsiyyətlərinə nəzarət edir.
Şagirdlərə öz biliklərini və tapşırıqların icra səviyyəsini necə artırmağı öyrədirlər.
Müəllimlər şagirdlərə istiqamət verməli, sinifdə şagirdlərin fəallığını təmin
etməli, onları həvəsləndirməyi bacarmalıdır. Müəllim valideynlərlə sıx əlaqə
saxlamalı, yeri gəldikcə valideynlərin də maarifləndirilməsi ilə məşğul
olmalıdır.
Valideynlər öz
övladlarının dərslikləri, müasir dərsə verilən tələblərlə tanış olmalıdır. Yeri
gəldikcə övladlarına yardım etməlidirlər. Övladlarının çətinliklərinin səbəbini
aydınlaşdırmalı, müəllimlərlə daima əməkdaşlıq etməlidirlər.
Şagird təlim
prosesinə məsuliyyətlə yanaşmalı, daima
axtarışlara, tədqiqatçılığa meyl etməli, hazır biliklərlə kifayətlənməməlidir.
Araşdırmalar aparmalı «niyə?», «nə üçün?» suallarına cavab tapmağa
çalışmalıdır.
Şagird bilməlidir ki, o, biliklərə təklikdə deyil, müəllimləri,
ən başlıcası isə yoldaşları ilə birlikdə əməkdaşlıq şəraitində daha asan nail
ola bilər.
Комментариев нет:
Отправить комментарий